Инсон бир умр эзгуликни, бахт-саодатни соғиниб, уларга интилиб яшайди. Энг гўзал шеърлар ҳам соғинчдан дунёга келади. Модомики, қалбингиздаяхшилик, хайру саховат соғинчи уйғоқ экан, демак, дилингиз равшан, ниятингиз пок, нигоҳларингиз некбиндир. Ўзининг "Кўнгил дарбозаси" (1993 й.), "Толе фасли" (1997 й.) номли китоблари билан шеърият ихлосмандлари меҳрини қозонган истеъдодли шоир Муҳиддин Омоннинг "Мунаввар соғинч" деб аталган ушбу шеърий мажмуаси ҳам ана шундай рангин ва соҳир туйғулар гулдастасидир. Киши руҳиятининг турли манзараларини теран фалсафий руҳ, ўткир мушоҳада, тизгинсиз тахайюлларга бой идрок ва гўзал бадиий тил билан ифодаловчи шеърлар Сиз - азиз китобхонларга манзур бўлади, деган умиддамиз.